Bamaku – wikipedia electricity prices going up

La rexón de Bamaku tuvo habitada dende tiempos prehistóricos, como asina lo confirmen les escavaciones arqueolóxiques de Magnambougou. Bamako, orixinalmente bàmakɔ̌ ("el caimán de los banzaos", en llingua bambara), [4] fundóse a finales del sieglu XVI polos Niaré, enantes llamaos Niakate, un grupu d’etnia soninké. Niaréla, el barriu fundáu polos Niaré, ye anguaño una de les zones más antigües de la ciudá.

A finales del sieglu XIX, Bamaku yera una importante ciudá fortificada de 600 habitantes, y un centru d’estudiu musulmán na dómina del imperiu de Malí, hasta que’l 1 de febreru de 1883, les tropes franceses empobinaes pol xeneral Gustave Borgnis-Enchas, tomaron la rexón.

Yá so’l dominiu francés, nel añu 1895 la ciudá conviértese na capital de la rexón, pa finalmente pasar a ser la ciudá más importante de la rexón del Alto Senegal y Níxer, el 17 d’ochobre de 1899. Darréu pasó a llamase’l Sudán francés nel añu 1920. Ente 1903 y 1907 construyóse’l Palaciu de Koulouba, que foi la residencia del gobernador y más tarde pasó a ser see de la presidencia de la República de Malí dende la independencia en 1960.

Sol dominiu francés desendólquense na rexón y na ciudá importantes obres de meyores d’infraestructures, asina nel añu 1904 inauguróse la llinia ferroviaria Dakar – Níxer, xuniendo les ciudaes de Dakar con delles de les más importantes qu’anguaño pertenecen a Malí. En 1905 empecipióse la construcción del Hospital del puntu G.

Asitiada na vera del ríu Níxer, la ciudá de Bamaku construyóse nuna curva del ríu, arrodiada de llombes. Espárdese per una superficie de 267km². Tien una población de 1.690.471 habitantes ( 2006) y un puertu fluvial sobre’l ríu Níxer. Ye’l mayor centru alministrativu, y comercial de Malí.

Bamaku ye la capital del únicu distritu del país. Concentra’l 70% de la producción industrial nacional. [5] Les principales producciones son les manufactures, incluyendo testiles, carne, metales y pesca. Amás, el sector terciariu ta bien desenvueltu, sobremanera l’artesanáu y el comerciu. Amás, esta ciudá ye la see de les grandes empreses nacionales y de l’Alministración del estáu.

Una llinia de ferrocarril xune Bamaku con Dakar, na vecina Senegal, pasando por Kati, Négala, Kita y Kayes. Una bona forma de comunicase na redolada de la ciudá ye’l mesmu ríu Níxer. Amás, existen carreteres asfaltaes que comuniquen la capital de Malí coles principales ciudaes de les distintes rexones del país. El proyectu de la Carretera Transaheliana dispondría que, procedente de Dakar, el vial pasara por Bamaku antes de dirixise pa Burkina Fasu, Níxer, Nixeria y Chad. Per vía aérea, el Aeropuertu Internacional de Bamaku-Sénou conecta la ciudá con abondos destinos africanos, amás de con París, a onde vuelen les compañíes Aigle Azur, Air France y Air Mali. Clima [ editar | editar la fonte ]

El clima ye tropical y daqué húmedu, el total de precipitaciones añales ye de 878 mm coles temporaes secu y lluviosu bien marcaes. El mes más secu nun recibe una gota d’agua (promediu de 0 mm en avientu), ente que’l mes más lluviosu ye bien llentu (234 mm en agostu). El promediu de temperatura añal ye de 27,8 °C, siendo’l mes más fríu avientu con un promediu de 24,8 °C, y el más caliente abril con 38,7 °C. Parámetros climáticos promediu de Bamaku, Malí (1950–2000)

La ciudá de Bamaku tien el calter de distritu a nivel nacional, de la mesma esti distritu queda estremáu en seis comuñes tal como s’afita na ordenanza del 18 d’agostu de 1978, modificada darréu pola llei de febreru de 1982. Estos seis comuñes tán subdividíes en barrios. Cada comuña ta dirixida por un conseyu municipal qu’escueye un alcalde ente los sos miembros. Amás estos conseyos escueyen los sos representantes nel conseyu del distritu , que se compón de 27 miembros. Finalmente estos representantes nomen al alcalde del distritu. [11] Acocora Sangaré ye l’actual alcalde del distritu de Bamaku, siendo escoyíu’l 6 de xunetu de 2007, sustituyendo nel cargu a Moussa Badoulaye Traoré, quien lu ocupó hasta’l 6 de xunu del mesmu añu. El vienres 19 de xunu de 2009 los ventisiete conseyeros del distritu de Bamaku ratificaron por unanimidá a Acocora Sangaré nel so cargu. Les últimes eleiciones comunales fueron el 26 d’abril de 2009.

• La Comuña I tien una población de 256.216 habitantes. Atiesta al norte cola comuña rural Djalakorodji (perteneciente al círculu de Kati), al oeste cola comuña rural de Gabakourou III y al sur col ríu Níxer. La comuña tien una superficie de 34,26 km2. Nueve barrios formen parte d’esta comuña: Banconi, Boulkassombougou, Djélibougou, Doumanzana, Fadjiguila, Sotuba, Korofina norte, Korofina sur y Sikoroni.

• La Comuña II llinda al este cola área de Korofina, al oeste coles faldes de la llomba del puntu G, al norte por llendes del Distritu y al sur pel ríu Níxer. Ocupa una superficie de 16,81 km2 y tien una población de 160.680 habitantes. La comuña ta estremada n’once barrios: Niaréla (el más antiguu, onde mora la familia fundadora de Bamaku), Bagadadji, Medina-Coura, Bozola, Missira, Hippodrome, Quinzambougou, Bakaribougou, TSF, Zona industrial y Bougouba. Nesta comuña alcuéntrase’l 80% de les industries de Malí.

• La Comuña III queda definida poles siguiente llendes: al norte pol círculu de Kati, al este pol Bulevard del Pueblu que lu dixebra de la Comuña II, al sur pola parte del ríu Níxer que queda ente’l pont deas Martyrs y el Motel de Bamaku, y al oeste pola Avenida Cheick Zayed El Mahyan Ben Sultan y la carretera ACI 2000. La comuña tien una superficie de 23 km2. La so población ye de 119.287 habitantes. La Comuña III ye’l centru alministrativo y comercial de la ciudá. Nella atopen los dos mayores mercaos de la capital, el gran mercáu Dabanani y Didida. Veinte barrio componen esta comuña y les llocalidaes de Koulouninko y Sirakorodounfing amestáronse a la comuña.

• La Comuña IV, cuenta con una superficie de 36,768 hectárees, con una población superior a los 200.000 habitantes. Les sos llendes afítense: al norte y al oeste’l círculu de Kati y al sur pel marxe esquierdu del ríu Níxer. Ta estremada n’ocho barrios: Taliko, Lassa, Sibiribougou, Djikoroni-Para, Sébénikoro, Hamdallaye, Lafiabougou et Kalabambougou.

• La Comuña V ocupa una superficie de 41 km2. Les sos llendes atópense definíos por: al norte pel ríu Níxer, al sur pela zona aeroportuaria y pola comuña de Kalanban-Coru, al este pola Comuña VI y el ríu Níxer. Cuenta con una población de 249.727 habitantes. Ta formada por ocho barrios: Badalabougou, Sema I, Quartier Mali, Torokorobougou, Baco-Djicoroni, Sabalibougou, Daoudabougou et Kalaban-Coura.

• La Comuña VI con una área de 8.882 hectárees ye la más vasta del distritu de Bamaku. La so población ye d’alredor de 600.000 persones. Ta constituyida por diez barrios: Banankabougou, Djanékéla, Faladié, Magnambougou, Missabougou, Niamakoro, Sénou, Sogoniko, Sokorodji et Yrimadio.